جميع الطلاب بكون هدفهم العلامة الكاملة (أو على الأقل الممتازة) في الرياضيات .. لكن للأسف قليل منهم يتمكنوا من الوصول لهذا الهدف
ففي هذا المقال رايح اعطيكم نصائح تساعدكم توصلوا لهدفكم إن شاء الله
أولا : التأسيس
تخيل معي انك اهملت التأسيس، ووصلت في التوجهي لدرس مثل النهايات المثلثية، اللي بحتاج الى تمكن في المتطابقات والبراهين، فكيف بدك تفهمه!
فانت لما تكون متأسس رايح تساعد حالك في التركيز على أفكار التوجيهي الجديدة بدل ما تشوش عقلك بأفكار التأسيس كمان
فأتمنى تكونوا شاركتوا معنا باحدى دورات التأسيس اللي عملناها مجانا … لكن إن كنت لم تشارك فأنصحك بدورة التأسيس اللطيف
للمشاركة في دورة التأسيس اللطيف المجانية :
يمكن تسأل لماذا هذه الدورة بالذات ؟! الجواب لانها مكثفة اولا (ما بتستهلك وقت) ، ثانيا لاني مفترض فيها انك بلشت دراسة توجيهي ومرتبها بحيث تساعدك تتأسس في الدرس اللي بتحتاج تاسيسه
ثانيا : مصدر الدراسة
لازم تختار المصدر اللي بناسبك انت، ابحث عن الأستاذ المناسب أو الدورة المناسبة .. هذا المصدر لازم يكون مغطي مادة التوجيهي اكيد ، لكن الأفضل انه يكون مغطي كل شيء ثاني ممكن يلزمك !
مثلا لازم يوفرك التأسيس وأوراق العمل وأسئلة السنوات والمراجعة والاختبارت بحيث انه يوفر عليك الوقت في البحث عن مصادر اخرى
طيب وين نلقى هذا المصدر : الجواب ببساطة…….. : ابحث !
ثالثا : أوراق العمل
من اكبر اخطاء الطلاب انهم ما بهتموا بأوراق العمل، بتلقى الطالب درس الموضوع الأول ثم الثاني ثم الثالث ، ثم الدرس اللي بعده ثم اللي بعده ، بصورة مستمرة ، بدون ما يحل ورقة عمل عشوائية على الدرس أو حتى على مجموعة دروس مجتمعة
وهذا خطأ كبير، ضروري جدا تحل اوراق عمل كل فترة، اولا كمراجعة لما سبق ، ثانيا حتى تحرك مخك وما تكون قريب من الحفظ، ثالثا لانه هيك الامتحان!
رابعا : الاختبارات
لا تقيم حالك بتمكنك من حل التمارين اللي بالدرس، لانك ببساطة كنت ما زلت تتعلم، لكن ضروري جدا يكون في اختبارات مستمرة عشان تعرف مستواك وتعرف هل عندك مشاكل وكيف تحلها
خامسا : التعامل الصحيح مع اسئلة السنوات
في خطأ بقع فيه الكثير من الطلاب وهو انه بحل أسئلة السنوات بعد كل درس، وهذا خطأ ، لازم تستغل اسئلة السنوات بأسلو ب افضل من هيك، لازم تستفيد منها على صورة اوراق عمل واختبارات بعد كل مجموعة دروس وبعد كل وحدة وبعد ما تختم المادة ، فاياك تجيب دوسية اسئلة سنوات مرتبة حسب الدرس هذه رايحة تضرك اكثر ما تفيدك
طيب وين ممكن نلقى اوراق عمل واختبارات وأسئلة سنوات ؟
الجواب : إن شاء الله رايح انزلها بصورة مستمرة على الموقع
سادسا : التعامل الصحيح مع الكتاب
احتمال في ناس نصحوك تدرس على الكتاب فقط، لكن الصراحة انا اعتبر هاي من أسوء النصائح !
اللي ألفوا كتاب الرياضيات افترضوا انه هناك شخص سوف يدرسك اياه، وما عملوه للدراسة الذاتية !
فالكتاب مهم ومفيد لكن اذا تعاملت معه صح، والتعامل الصحيح معه هو انك تستغله في المراجعة (سواء مراجعة درس أو دروس أو وحدة) يعني باختصار افهم من استاذك بعدين ارجع للكتاب
طيب هل ضروري ارجعله ؟ اكيييييييييييييييد ، افكار الامتحان مأخوذة بطريقة ما من الكتاب، فانت لازم تثبت هاي الأفكار وتتقنها !
أخيرا : بعض النصائح العامة
افهم ولا تحفظ .
لا تضيع وقتك بالأفكار الفلسفية البعيدة عن الكتاب.
ثق بنفسك وضلك ورا التحديات (المنهجية) تا تحلها لوحدك
راقب وقت دراستك الفعلى وقلل من تضييع الوقت
اعطي نفسك حقها من الراحة والترفيه
اختم موادك قبل التجريبي بمدة كافية عشان تمكنها بالمراجعة
اذا اكتشفت مشكلة معينة عندك ابحث عن حلها والتزم بالحل
ملاحظة لطلابي :
طلابي اللي مشاركين معي بالدورات الأونلاين، ما في داعي اتابعوا اي شيء اخر غير الدورة، سواء كان مصدر خارجي أو اي شيء ذكرته بهذا المقال، لانه ببساطة هذا اللي بنعمله بالدورة .. فقط تابعوا معي اول بأول ورايح اوفرلكم كل شيء
اتمنى التوفيق للجميع
الكاتب :
الأستاذ ثامر قدورة .. مدرس مراحل جامعية وثانوية ..
مؤلف سلسلة النصيحة التعليمية في : الكالكولس 1 و 2 والدف (جامعة اليرموك) … وفي التوجيهي العلمي (تأسيس ومستوى ثالث ورابع)
مؤسس موقع النصيحة التعليمي والمشرف عليه
أول من استعمل أسلوب الدورات العالمية الحديث في الدورات الأونلاين في الأردن
دورات يقدمها على الموقع : https://naseehamath.com/courses-list
الله يعطيك العافية استاذنا و ان شاء الله راح يصير الموقع الاول بالاونلاين
ما شاء الله موقع إحترافي يستحق كل التقدير والاحترام
موقع رائع واستاذ اروع
الله يجزيك كل خير يا أستاذ
فعلاً أُستاذ ومعلم بمعنى الكلمة 👌❤
فعلا انك عندك خبرة واضح من كلامك استاذي الكريم
شكرا كثثير ز. ويعطيك العافية على كل شي بتعملوا
فعلا يا استاذ انك نبر ون بالرياضيات بالاردن وان شاء الله الموقع يكون الاول دائما والله يجزيك الخير لانك سهلة علينا مادة الرياضيات
بوركت جهودكم معلمنا القدير