ايهما افضل التعليم الالكتروني أم التقليدي ؟

السلام عليكم

بعد سنة كاملة من تجربة التدريس الأونلاين، وبعد ما انسألت سؤال “مين افضل الدراسة العادية(المراكز) والا الأونلاين؟ ” كثيييييييييير
صار الوقت اني ما اجاوبكوش هههههههههههه
فعلا ما بدي اجاوب على السؤال، لكن بدي اناقش معكم حسنات وسيئات كل جانب، وانت شوف اللي بناسبك وقرر بنفسك
————————————————————–
توفير الوقت :
اكيد الأونلاين بوفر وقت لانه ما في مواصلات مثلا
—————————————————————
تنظيم الوقت :
نوعا ما التدريس العادي بساعد اكثر في تنظيم الوقت، لانه الطالب بعرف انه الحصة اذا راحت ما رايحة تنعاد . فبضطر يلتزم اكثر بالدراسة أول بأول
لكن القاعدة هاي مش دايما هي الصح، لانه في بالأونلاين نسبة كبيرة من الطلاب منظمين حالهم وبدرسوا الحصص أول بأول بناءا على ضميرهم وطموحهم، وكمان في بالتدريس العادي طلاب بتتراكم عليهم المواد وبتأخر عن الاستاذ
فالشغلة بتعتمد على الطالب بالدرجة الأولى، وكل واحد يفكر بوضعه والتزامه قبل ما يقرر
——————————————————————-
امكانية الاعادة :
شبه معدومة بالعادي، متوافرة بالأونلاين
——————————————————————–
امكانية التفاعل مع الأستاذ وسؤاله :
بالعادي : حسب الأستاذ، إن كان بسمح بالأسئلة فالتفاعل معه اسهل
بالأونلاين : كمان حسب الأستاذ والموقع إن كان بجاوب على الأسئلة والا لأ (90% من الأساتذة لأ … انا عن نفسي بفتخر انا بجاوب الكل)
———————————————————–
السرعة :
بالأونلاين بقدر الطالب يقدر السرعة اللي بتناسبه، مثلا إن كانت الدورة كاملة نازلة بقدر يسبق فيها، وان كان حاب يمشي على مهله بقدر
بالعادي انت ملزم بسرعة الاستاذ
——————————————-
التعارض مع اوقات المواد الثانية :
موجود بالعادي بس
——————————————-
الطالب الضعيف
بالعادي ان كان الاستاذ طويل بال بفيده اكثر، لكن هاي غالبا بتكون بالبيتي حتى مش بالمركز، لانه صعب الاستاذ يضيع وقت باقي طلاب المركز مشان طالب .
بالأونلاين بقدر الطالب يعيد الحصة تا يفهمها، لكن هاي الشغلة لازم يجربها اول هل هي كافية لحل مشاكله والا لأ … وكل موقع بحط حصص تجريبية
——————————————
الطالب المتميز :
انصحه بشدة بالأونلاين، لانه اسئلته اقل بتكون، وبقدر يسبق غيره، والوقت اللي بوفره بالمواصلات بقدر يستغله بدراسة اضافية !
وانا الصراحة لاحظت انه نسبة الطلاب المتميزيين عندي بالأونلاين اضعافها بالعادي !
——————————————
فهاي الحسنات والسيئات اللي شفتها … فأفضل شيء انك تجرب
مثلا محتار بين استاذ فلان بالأونلاين واستاذ علان بالمركز ، بكل بساطة احضر حصة هون وحصة هون ، وشوف مين افضل، بعدها اعمل برميل نسكافيه، واقعد فكر بباقي الحسنات والسيئات، ثم بعد ما تقرر على اشي اياك ثم اياك تسمع راي حدا ثاني، خلص قررت نفذ ولا تتردد ولا تتلتفت لرأي شخص، صار وقت العمل ، والله يباركلك باللي اخترته

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *